زامان پاشازاده

گئجه 

ساعاتیمی قورموشدوم تکرارلاریما

قان بویالی بیر کابوس‌لا قول بویونلوغومدا

بیرآدام،

تبریزین ساعاتینین سارقاجیندان آسلانمیشدی

ساعاتین عقربی شافاقدا تیتره‌ک ،

اونون گؤزلرینده

دان یئری آغاریردی .

بوتون پولیس تئلئفونلاری ایشغال

ایلقار موذن زاده

ادبیات نوبئل اؤدولو و یئنه ده آوروپا!

نوبئل آکادئمییاسی‌نین رسمی سیته‌سی، اکتبر آیی‌نین سگگیزی (مهر آ‌یی‌نین اون آلتی‌سی) ایران واختی ایله گون اورتا چاغی ساعات 2:30دا، 2009-جو ایلین ادبیات اؤدولونو "هئرتا مولئر"ه ایتحاف ائتدی. نوبئل آکادئمیاسی‌نین دئدییینه گؤره "هئرتا مولئر"ین دوز یازی و شئعیر یاپیتلاری، نوبئل اؤدولونو اونا قازاندیردی.

آرتیق نئچه ایلدیر ادبیات نوبئل اؤدولو آوروپا یازیچیلارینین اینحصاریندادیر. بو سون نئچه ایلده فرانسالی "ژان ماری گوستاولو کلزیو"، بریتانیالی "دوریس لیسینگ"، تورکییه‌لی "اورهان پاموک"، بریتانیالی "هارولد پینته"، اتریش لی "الفریده یلینک" دن سونرا آلمانیالی بیر یازیچی یعنی یئنه ده آردیجیل اولاراق بیر آوروپالی بو اؤدولو الده ائتدی.  

دوستاق

بوراسی شوشه دووارلی بیر دوستاق
زهرلی گؤزلرین سوزگجینده
دمیر بارماغ‌لیق‌لار سایاق دوزولن اینسان‌لار دوستاغیندا
سیناق سیچانلاریییق بیز.

جان سوموروجو سئروم‌لار
و قان امیجی قام‌چی‌لار سیناغین‌دان کئچیریلیریک.
باشیمیزدا دوه دری‌سی
و یادداشیمیزدا تیکان تیکان بئینیمیزه یئدیزدیریلن اؤلوم.
جانیمیز یولوخوجو خسته‌لیک‌لر یئمی
و قانیمیز دونیانی دیزه چؤکدورن ائپیدئمی.

اورمو

سئوگی دوزلاغیندا

آددیم‌لاریم دوغما شهرین پیچیلتی‌سیندا

ایلان‌لارین سئویشمه‌سی کیمی سس‌سیزدیر

یاشام‌لاری قدر قورخونج

آلیشدیم

ایلقار موذن زاده

خینا گئجه سی

خینا گئجه سینده، اللره یازیلان سؤزجوک لرده سنی آراییردیم. بوتون یولداشلار، سؤزجوک لرین شکیلینی اللرینده قیزاردیردیلار. اووجومون اورتاسیندا کی توپلانمیش خینانین سرینلیگینی دویارکن دووارا باخیردیم. یولداشلار گولومسه یه ـ گولومسه یه بیر بیرینین اووجونداکی سئودا سؤزجویونه باخاراق، منیم یومولموش و سیخیلمیش اووجوما گؤزلری تیکیلدی.

هامی نین اووجو آچیلیردی و نقش اولونموش بیر اوره ک شکیلینین ایچینده، سئوگی لی آدین بیرینجی سؤزجویونو، بیر بیرینه گؤرسه دیردیلر. A ،D  ، V ، E ، S ... و  سئوگینی اللرینده اویناداراق قاداسینی آلیردیلار؛ جئیرانیمدی، نازیم دی، اوره ییم دی دئمک له. یومولموش اووجوملا کاغاذ مندیل پایلایانا گؤزوم ساتاشدی و اونون آردیندا الینده زیبیل قابی اولان بیر اوشاق، سئوگیه به لنمیش مندیل لری قابا تؤکوردو. بوتون یولداشلارین گؤزلری منیم اووجوما تیکیله رک، یازیلان سؤزجویو حدس ووروردولار. من ایسه بئینیمده هئچ بیر سؤزجویون اولمادیغینا گؤره کدرلی. اووجوم آچیلدی و اینانمادان الیمده یازیلمیش "T" سؤزجویونو گؤردوم.

ههههه...! تومروس دور، یوخسا تورک آی؟ آی قورد! تورکان دیر یوخسا تئللی ناز؟

 هره بیر سؤز دئییردی؛ آنجاق هئچ کیمسه نین فیکیرینه "تانری" گلمیردی!

سس و شئعیر : عیسی زینی

 دینله یین

زامان پاشازاده

بیر گون ،

تانری اؤزویله شاهمات اوینایاندا

بیر سنی یاراتدی بیر منی

آغ،قارا

آغ ائولر،قارا ائولر

اوردو قوردوق قارشیتلاریمیزلا

قالالار سالدیردیق

یاراقلاندیق

و یاشاماق باشلاندی قارالاردا و آغلاردا.

ایلک کره،

اوخو یاییندا داریخمیش

بیر جوت عسگرینه توش گلدیم.

او گؤزلرینین

سارسیدیجی سالدیریسی‌یلا باشلادی هر شئی.

ایلقار خییولو

اورتاچاغ

711-جی ایلده عرب حمله سیندن سونرا، "ایبئر" یاریم آداسیندا دانیشیلان "لاتینجه"، گئتدیکجه یئره ل بیر دیله چئوریلدی.

9-جی یوزایللیکده، ایچ بؤلگه نین قوزئیینده "بورقوس" کندینین دولایلاریندا اورتایا چیخان "کاستیلیا" لهجه سی، ایسپانیانین عرب حمله سیندن قورتولماسیلا، گونئیه دوغرو یاییلماغا باشلادی.

11-جی یوزایللیکده "مادرید" و "تولدو" دولایلاریندا دانیشیلان بو دیل، 15-جی یوزایللیکده "کاستیلیا" و "آراگون" پادیشاهلیق لارینین بیرلشمه سیله، ایسپانیانین رسمی دیلی اولدو و بئله لیکله ایسپانیانین اولوسال دیلی یعنی "کاستیلیا" لهجه سینده یازیلان یاپیت لار، ایسپانیول ادبیاتینین آنا بؤلومونو خلق ائتدی.

1085 ده "تولدو"نون عرب حمله سیندن قورتولماسیلا، بو کند دوغو دیللریندن یاپیلان چئویریلر ایچین بیر اوجاق اولموشدو. بو چئویریلر نثر قولونون گلیشمه سینده اؤنملی بیر ائتکه ن اولدو.

11-جی یوزایللیکدن قالما بیلینن ایلک ایسپانیول متن لری، عرب حرفلریله و "کاستیلیا" لهجه سیله یازیلیب. بو اثرلر یالنیزلیق و سئوگی کیمی اینجه دویغولاری دیله گتیره ن قیسا شئعیر لر دیر. داها سونرالار ایسه بوتون آوروپادا یایغینلیق قازانان، قهرومانلیق داستانلاری ایسپانیادا دا یایغین بیر ادبیات آخیمی اولدو. بونلارین آراسیندا ان اؤنملی اولان یازی و 12-جی یوزایللیکدن گونوموزه قدر داوام تاپان، یازاری بیلینمه یه ن، "السید حماسه سی" دیر. بو اثر "کاستیلیا" سویلو "روی دیاث دی فیفار"، "مغوار" لقبیله تانینان و وطن سئوه‌رلیک اوغروندا قهرومانلیق لار یارادان بیر دؤیوشچونون ناغیلیدیر. بو اثر دئمک اولار ایسپانیول ادبیاتینین بیرینجی نثر اؤرنه ییدیر. بو چاغدا فرانسیز داستانلارینین یانی سیرا، دینسل قونولو شئعیرلرده یازیلدی...

کامیل قهرمان اوغلو

آرمود یاشیللیغینا آخیردی گونئی!

آلما آلیشماسینا،

بیر قاریشقانین گؤزونده اوشاغا قالدی او!

بیردوغوزون باخیشیندا،

اؤپوش-اؤپوش مچیدلری یالادی!

وآسلاندی قیفیللاردان.

گؤز یاشیندان پیغمبر آخدی

…و تانری سؤیودلری ساغینا وئردی.

ووه…الله اکبر!

زامان پاشازاده

حایاتدان کسیب

یاماییرام خایال شه‌هریمه!

دووار- دووار تیکیرم

گویه‌رچین نونوندن داها آلچاق،

وقارتال اوچوشوندان داها یوکسک!

خایال-خایال گومولورم

یاشاییرام اؤلورم.!

هاچانسا باتمیش بیر شهرین تاپینتیسی تک

کرپیچ-کرپیچ،

 سوموک-سوموک خورتلایاجاغام.